2002 മുതൽ 2013 വരെയുള്ള കാലഘട്ടത്തിൽ സൗത്ത് ഇന്ത്യൻ സിനിമയിൽ നിറഞ്ഞ് നിന്നിരുന്ന നടിയായിരുന്നു ഗോപിക. ഗോപിക എന്ന പേര് കേൾക്കുമ്പോൾ തന്നെ മലയാളിക്ക് ഓർമ വരുന്നത് ലജ്ജാവതിയെ എന്ന തട്ടുപൊളിപ്പൻ സൂപ്പർഹിറ്റ് ഗാനവും ഫോർ ദി പീപ്പിൾ എന്ന സിനിമയുമായിരിക്കും.
മുപ്പത്തിയെട്ടുകാരിയായ ഗോപിക സിനിമയിൽ വരുന്നതിന് മുമ്പ് ഗേളി ആന്റോയായിരുന്നു. സിനിമയിൽ വന്ന ശേഷമാണ് സ്ക്രീൻ നെയിം ഗോപിക എന്നായി മാറിയത്.
മലയാളത്തിന് പുറമെ തമിഴ്, തെലുങ്ക്, കന്നട ഭാഷകളിലുള്ള സിനിമകളിലും ഗോപിക അഭിനയിച്ചിട്ടുണ്ട്. മോഡലായിട്ടാണ് ഗോപിക കരിയർ ആരംഭിച്ചത്.
തൃശ്ശൂരിലാണ് ഗോപിക ജനിച്ച് വളർന്നത്. ആന്റോ ഫ്രാൻസിസിന്റേയും ടെസി ആന്റോയുടേയും മകളാണ് ഗോപിക. താരത്തിന് ഒരു സഹോദരി കൂടിയുണ്ട്. സോഷ്യോളജിയിൽ ബിരുദം നേടിയിട്ടുള്ള ഗോപിക ക്ലാസിക്കൽ ഡാൻസും അഭ്യസിച്ചിട്ടുണ്ട്.
ബ്യൂട്ടി കോൺടസ്റ്റായ മിസ് തൃശ്ശൂരിൽ പങ്കെടുത്തതോടെയാണ് ഗോപികയുടെ ജീവിതം മാറി മറിഞ്ഞതും സിനിമയിലേക്ക് അവസരം വന്നതും. മിസ് തൃശൂരിൽ റണ്ണറപ്പായിരുന്നു ഗോപിക. ശേഷമാണ് മോഡലിങിനുള്ള അവസരങ്ങൾ ഗോപികയെ തേടി വന്നതും താരം അതിലേക്ക് തിരിഞ്ഞതും.
അഭിനയത്തോട് തീരെ താൽപര്യമില്ലാതിരുന്ന വ്യക്തി കൂടിയായിരുന്നു ഗോപിക. എയർ ഹോസ്റ്റസാകണമെന്നതായിരുന്നു ഗോപികയുടെ ലക്ഷ്യം. പക്ഷെ ഗോപികയെ ജീവിതം കൊണ്ടെത്തിച്ചത് സിനിമയിലാണ്.
പ്രണയമണിത്തൂവൽ എന്ന മലയാള സിനിമയായിരുന്നു ആദ്യമായി ഗോപിക അഭിനയിച്ച സിനിമ. തുളസീദാസ് സംവിധാനം ചെയ്ത സിനിമയിൽ വിനീത് കുമാറായിരുന്നു ഗോപികയുടെ നായകൻ.
ഗോപികയുടെ മൂന്നാമത്തെ സിനിമയായിരുന്നു ഫോർ ദി പീപ്പിൾ. ന്യൂജനറേഷൻ സിനിമ വിഭാഗത്തിൽ ഇന്നും ഉൾപ്പെടുത്തുന്ന സിനിമ കൂടിയാണ് ഫോർ ദി പീപ്പിൾ. ചേരൻ സംവിധാനം ചെയ്ത് നായകനായ ഓട്ടോഗ്രാഫാണ് ഗോപികയുടെ കരിയറിലെ ആദ്യത്തെ അന്യഭാഷ സിനിമ.
